ليه مينفعش نطبع فلوس كتير ونبقي اغنيا

ليه الدولار بيغلي، وليه مينفعش نطبع فلوس كتير ونبقي اغنيا، ليه الحكومة متطبعش فلوس وتمشي بعربيات توزعها في كل حتة ونبقي دولة اقتصادها قوي، وهل ده ينفع أصلاً وده موضوع النهارده

طريقة البيع والشراء قديماً

• لحد سنة 1931 كانت الدول بتربط قيمة الفلوس بالدهب يعني انت عشان يكون معاك مبلغ من المال كان لازم تروح البنك وتديهم الدهب بتاعك والبنك بيديك وصل أمانة بيثبت انك معاك مثلاً بـ 100 جرام دهب وبيساوا كام بالجنيه وكان الورق ده والدهب بيمثلوا الفلوس يعني لو ممعكش دهب يبقي ممعكش فلوس.

• لكن مع الوقت الدهب في العالم بدأ يقل والدول والتجار اللي كان عندهم دهب من غير إنتاج بعد الحرب بقوا يعتمدوا على احتياج الناس للدهب وبيتغنوا من غير شغل ولا إنتاج بالاستغلالية يعني في الوقت اللي كان في دول تانية محتاجة للدهب ده

بدأ صناعة العملات الورقية

• وعشان كدا في سنة 1937 الفلوس مابقتش مرتبطة بمعادن خالص، واكتسبت قوتها من القانون وده في حد ذاته ادي قيمة للورق، وعلشان كدا دول كتير أخدت احتياطاتها علشان تكون هي الجهة الوحيدة القانونية اللي من حقها تطبع الفلوس لباقي الدول.

• وبقوا بيستخدموا خامات معينة لطباعة ورق العملات تخليها صعبة التزوير ونسيج الورق بتاعها كان مختلف وبقوا يحطوا عليها علامات مائية زي اللي بنشوفها ع الفلوس.

ليه مينفعش نطبع فلوس كتير ونبقي اغنيا

• طيب خلينا الأول نوضح القانون الرسمي لاي اقتصاد في العالم و هو قانون العرض و الطلب .. يعني ايه ؟ 

يعني ايه اللي بيخلي الدهب غالي و عصير القصب رخيص؟؟ 

ببساطه بسبب ( النُدرة ) .. يعني كمية الدهب اللي في السوق قليلة و نادره فالطلب عليه بيزيد و بالتالي سعره بيزيد .. انما القصب موجود في كل حته فالطلب عليه بيقل فـ سعره بيقل .. 

• فلو حضرتك طبعت فلوس بزياده ومليت بيها السوق ساعتها قيمتها هتقل وده نفسوا اللي حصل مع الجنيه بتاعنا، احنا لما طبعنا فلوس بزيادة من غير ما نبص لسعر الدهب ومن غير ما انتاجنا يزيد ساعتها قيمة الجنيه بتاعنا قل ف طبيعي أن قدامه قيمة الدولار تعلي

يعني ايه قيمة الفلوس بتقل؟

• مش ساعات والدتك تقولك هي الدنيا حصل فيها ايه ؟؟ انا كنت زمااان بنزل السوق بـ 10 جنيه اجيب طبيخ و لحمه و رز و اخد الباقي و ارجع :D دلوقتي بنزل بـ 100 جنيه و تخلص في ساعتها البركه قلت :/

• لا يا حجه البركه مقلتش ... الفكرة في ان عدد سكان مصر زاااد و بالتالي بقي في افواه كتير جعاااانه واستهلاك المنتجات زاد :D فـ الطلب علي السلع بقي اكتر و انتاجنا للسلع زي ماهو و بالتالي السلع سعرها غلي :D و الاسعار اما غليت ، الـ 100 جنيه مبقتش تكفي

• و ده بالظبط اللي هيحصل لو الحكومة طبعت فلوس كتير .. الناس هتبقي عايزه تشتري اكتررر فـ الطلب علي السلع هيبقي اكبر و بالتالي الاسعار هتزيد اكتر اكتر :D

• ‏وساعتها هتيجي الست الوالده تصوت في البيت تاااني و تقول هو فيه ايه ؟؟؟ انا بقيت اروح السوق بـ 1000 جنيه و بيخلصوا في ساعتها !! اصل البركه قلت :/ . 

مثال اخير وهقولك الخلاصة

• لو محل سندوتشات عنده عشر سندوتشات والسندوتش بعشرة جنيه وفي 10 أشخاص كل واحد فيهم معاه 10 وهيشتري سندوتش، كده احنا تمام افرض بقي الحكومة عملت زي ما انت وطبعت فلوس كتير وباقينا اغنية وبدل ما كان معاك 10 جنيه تشتري بيها سندوتش بقي معاك 20 فساعتها العشر اشخاص اللي كان كل واحد فيهم هيشتري سندوتش بعشرة جنيه كده هيشتري سندوتشين فصاحب المحل مش في مقدورته غير أنه يطلع في اليوم عشر سندوتشات فعشان يقدر يواجه المشكلة دي يقوم رافع سعر السندوتش لـ عشرين جنيه عشان انت ترجع تاني تشتري سندوتش واحد والسندوتشات اللي عنده تكفي الناس 

الخلاصة

• واللي في مقدمة الكلام ده كله ان لكل عملة نقدية في ادينا بيبقي ليها مقابل من الدهب او الفضه في البنك المركزي للدولة فمفيش دوله تقدر تطبع ورق نقدي مادام ملهوش مقابل من الدهب في خزينة البنك و إلا يبقي تزوير :D

• ‏فـ بدل ما تقول للحكومة تطبعلك فلوس كتير لازم الاول تقولها تزودلك الانتااااج بانها تفتح مصانع اكتر و فرص عمل اكتر و تعيد استغلال الموارد بتاعتنا المهدرة دي صح فـ الانتاج يزيد و ساعتها يقدروا يطبعوا فلوس اكتر، دول الخليج مش اغنية من طباعة الفلوس دول الخليج اغنية بسبب أن الإنتاج عندهم كبير

فيديو تفصيلي للتوضيح اكتر